تجربه ام فى تربيه ابنائها ما شاء الله عليهم

من طرف **Admin** الأربعاء سبتمبر 30, 2015 3:15 pm

السلام عليكم ورحمة الله وبركاته
حياكم الله وبياكم وجعل الجنة مثوانا ومثواكم
حبيباتى فى الله الامهات الفضليات والبنووتات القمرات اللى بكره بأذن الله هايبقو امهات
انا يا بنات أم عاديه جدا زى اى ام فيكم عندى بنت عمرها سبع سنوات وولد عمره 4 سنوات ونص تعبت جدا جدا فى تربيه ولادى ولأنى ما برضاش بالغلط ومش بأقبل

انصاف الحلول اتمنيت من قلبى ان ولادى يكونو على خلق وعلى دين ويكونو مميزين بتربيتى ليهم مش بمدارسهم ولا بلبسهم ولا مستوى معيشتهم

والحمد لله لحد دلوقتى ربنا كرمنى فيهم اخر كرم وبقو ولله اللحمد بالرغم من سنهم الصغير ألا انهم مضرب للمثل فى كل عيلتى وعيلة زوجى للأدب والاخلاق و حسن التربيه
لدرجة ان بنتى ولله الحمد فى العام اللى فات فى مدرستها اتكلمو عنها كمثال للبنت المؤدبه وازاى البنت المفروض تبقى وده كان فى يوم مجلس الابااء وكنت قاعده راسى
فى سابع سما وانا شايفه بنتى مثال للبنت المهذبه وجوزى يومها واحنا راجعين من المدرسه كان فخوووووووووووووور بيا وبالبنت وقالى شايفه نتيجة تعبك بقت ايه
واحنا مروحين اشترينا لجوجو حبيبة قلبى بوكيه ورد صغير تعبير ليها أننا فخورين بانها بنتنا
علمت ولادى اداب الحديث
أداب الطعام
اداب قضاء الحاجه
أحترام الكبير والعطف على الصغير
الصوت الهادى
حب الوالدين والبر بيهم
حب الأشقاء والعطف عليهم
حب الاقارب والاحسان ليهم
كرم الضيافه
اداب الطريق
اداب أستخدام الملكيات العامه
الثقه بالنفس والاعتماد على النفس
حب الله والخوف من عقابه والطمع فى الثواب
حب الرسول عليه الصلاة والسلام وال البيت والصحابه الكرام
كره كل ما هو بغيض ومنفر
النظافه الشخصيه ( البدن والملبس والمأكل والمشرب و المنزل )
والله يا بنات باحس بمتعه كبيره وانا باعلمهم واتعلم منهم ومعاهم وبهذب نفسى معاهم واتغيرت كتيررررررررررررررررررررر قوى بيهم وليهم وبدعى ربنا من قلبى
يقدرنى واكمل المشوار على خير وينجحو فى حياتهم ويتفوقو فى دراستهم ويتفقهو فى دينهم
وان شاء الله المشوار طويل لكن مش صعب محتاج مننا صبر وطول باال وأقبال على الحياه
****************************************
بسم الله الرحمن الرحيم
نبدء على بركة الله
اول حاجه يا بنات ممنووووووووووووووع منعا باتا مقارنه اولادك باولاد غيرك او حتى باخواتهم لأنى دى اكتر حاجه بتقتل ثقة الطفل فى نفسه وبيخليه انه مهما يعمل عمره ما هايعرف يبقى زى فلان
وممنووووووووووع منعا باتا السب والشتم لأى سبب مهما كان لأن لو الطفل اتعود على الاهانه صدقينى والله لما يكبر هايبقى ما عندوش كرامه وسهل الانقياد
خلى ولادك يفهمو ان كرامتهم خط احمر ممنوع المساس بيها لأى سبب
ممنوووووووووووع ممنووووووووووووووع الضرب بس مش هاكدب عليكم وأقول انى مانعه الضرب تماما لاء طبعا اوقات بيبقى ما فيش حل غير كده لكن مش ضرب بالمعنى الحرفى للكلمه
يعنى مش الضرب اللى يوجع ويسيب اثر لاء انما ضرب تذكير بمعنى اصح ضرب الكرامه هاتقوليلى يعنى أيه ضرب الكرامه هاقولك لأنى انا وانتى معودين ولادنا ان كرامتهم خط احمر
وما فيش اهانه للكرامه اكتر من الضرب فلو بس ضربتى واحد على أيده هايزعل قوى وويحس انه اتهان وبالتالى مش هايكرر الغلط عشان ما يتهانش تانى
انا باتبع اسلوب الثواب والعقاب بس مش دايما ومش فى كل حاجه لأن الطفل ذكى جدااااااااااا ومكن قوى يعمل الحاجه بدون اقتناع بس عشان المكافاه يبقى فى حاجات لما تتعمل طبيعى
ما يتكافؤش عليها لأنها طباع وأسااسيات فى الحياه ودى هايجى الكلام عنها فى وقتها
ممنوع عليكى كأم الصوت العالى والنرفزه الغير مبرره وحطى تحت الغير مبرره دى مليون خط لأن ليها معانى كتير اولا الغير مبرره دى ليكى ولا للطفل لاء طبعا للطفل يعنى مثلا انتى شوفتى خبر ضايقك
او اختلفتى مع زوجك او اى حاجه حصلتلك اجى اطلع غلى فى العيال وأقول عصبيتى مبرره لاء طبعا مش مبرره هو مالوش علاقه وما لوش ذنب وبرضه فى وقته هاتكلم عن النرفزه المبرره للطفل
ممنوع عليكى الكذب لأى سبب من الأسباب ممنوع تغتابى اى حد او تتكلمى على حد من ظهره ممنوع الحلفان والرجوع فى اليمين
ممنعو بتاتا ومهما اختلفتى انتى وزوجك ان الخلافات تبقى ادام الاطفال ولو أضطرتك الظروف انهم يشوفو الخلاف ممنوع الاساءه بالقول او الفعل لزوجك قدام ولادك مهما كانو صغيرين ودى نقطه مهمه جدا هانتطرق لها لأنى بأشوف نماذج بجد ببقى مذهوله منها زى الام اللى تقول انا ولادى بيدافعو عنى لو اتخانقت مع باباهم وبييجو فى صفى دى بجد كارثة الكوارث
****************************************
سألتونى ابتديت امتى
ابتديت يا بنات من اليوم االلى روحت فيه بيتى من المستشفى بعد الولاده هاتقوليلى دى كانت بيبى يا دوب ساعات هاقولك وماله ما هو ده وقته واقسم بالله اللى عملته وقتها ريحنى للأبعد حد بعد كده
ازاى بقى لما روحت البيت كنت فرحانه بالبيبى قوى ربنا يرزق كل مشتاقه بس مش معنى فرحتى بيها انى اعاملها زى العروسه اللعبه وافضل شايلاها 24 ساعه فى اليوم لأن ده هايعودها على الشيل
وهى بنت ساعات وهايتعبنى انا جدا ويخلينى اقصر فى حق زوجى وبيتى ونفسى وهيا كمان لأنى هابقى تعبانه من كتر شيلها لو اتعودت فبالتالى مش هايبقى عندى طاقه اديها لحد
مسكت نفسى ومسكت على قلبى وبقيت أشيلها بس وقت اللزوم يعنى وقت الرضاعه ووقت الغيار وما دون ذلك هى فى سريرهاا لما تعيط اشوف أذا جعانه او عاوزه تغير او لا قدر الله عندها مغص
أو فى حاجه تعباها ما فيش حاجاه تعباها يبقى تمام اغير بقى وضعية نومها اكتر من مره او اشوف اذا لبسها والغطا مناسب للجو خلاص كله تمام أرقيها وأشغل جنبها قران بصوت هادى جدااااااااااااااااا
ولو عيطت تانى بدون سبب مش اجرى وأشيل وافضل اهز وارج فيها زى ازازة البيبسى لالاء طبعا اغير وضعية نومها تانى واطبطب بالراحه جدا لحد ما اتعودت تروح فى النوم لوحدها بدون مساعده منى
وده ريحنى وريحها كتير جدااااااااااااااا
كبرت البنت وبقى عندها ييجى اربع شهور ابتدت تفوق وتستوعب اللى حواليها هنا بقى ابتديت التربيه واول حركه عملتها وكل الاطفال بيعملوها هى عض الثدى بشده اثناء الرضاعه ودى لكل اللى بيرضعو
عارفين انها حركه مؤلمه جداااااااااااااا مش تسكتى بقى وتقولى دى بيبى ومش هاتفهم انا مش باقولك اضربيها ولا زعقيلها لاء طبعا نظره بسيطه عينك فى عينها وقوليلها لاء هاتلاقيها سابت صدرك
وبصتلك شويه تروحى مكرراها تانى بهدوء وعينك فى عينهاا وتقولى لاء هاتروح مكمله رضاعه وتعمل نفس الحركه تانى وتبصلك برضه المره دى بقى بحزم بسيط جدا ونظره حازمه بسيطه جدا جدا
وتشيلى صدرك من بقها وتقولى لاء مره على مره هاتفهم وتبطل تعملها
أتعودنا كمان على لغة العيون من السن ده برضه طول ما هى بترضع عينى فى عينها والله ثم والله كنت باحس انها فاهمه اللى فى قلبى من عيونى وافضل عينى فى عينها طول ما هى بترضع لحد ما تروح فى النوم
كان بيبقى نوم هااااااااااادى وباحس انها مرتاحه لأن الرضاعه دى وقتها لوحدها مش ابقى برضعها وبتكلم فى التليفون مثلا ولا بتفرج على التليفزيون لاء طبعا اهتمامى بيها وليها لوحدها فهى كده حاسه انها
بتشبع منى قبل ما تشبع من صدرى بالتالى بتنام ملئ جفونها
بعد كده البيبى كبر ووصل ل 6 شهور وأبتددى بقى اللعب والحركات وشد الوش والضرب بالكفوف والحاجات دى برضه ما تسكتيش وتقولى طفل نلعب ونهزر ونزغزغ ونعمل كل حاجه أبتدى الضرب
او الشد المره دى بقى النظره حازمه اكتر وكلمة لاء حازمه اكتر ومع كلمة لاء نقول عيب او غلط او اللى يعجبجكم أياكى انك تضحكى لأنه هايفهم انك اتبسطى ويكررها ويكررها ويكررها وتبقى عاده
ولما هايكبر شويه هايعملها مع الجميع و ممكن بعد كده يبقى عدوانى ويضرب اى حد لاء ابتدى من بدرى وما تقوليش ده صغير ومش بيفهم لاء هما بيفهمو بس ما يعرفووش يعبرو وبعدين التعامل
ده بينمى مداركهم وخلى بالك هايعمل حركه اللى بيقلب بيها بقه لما يبقى زعلان اوعى تضعفى وقولى ان ده غلط وماما زعلت ودقيقتين وخديه فى حضنك وطبطبى بس بدون ما تضحكى
7شهور بقى أبتدت التربيه بالنظرات لما يغلط نظره حازمه ومعاها كلمة هااااااااااااااااا كرر الغلط هاتكررى نفس الكلمه ومعاها كده غلط او ممنوع او اللى يعجبك كرر الغلط وقتها بقى تبصى نظره
حازمه بدون اى كلام وتزمى شفايفك شويه مره على مره هايفهم معنى نظرتك واول ما يغلط هايبصلك عشان يشوف رد فعلك ودى هاتفيدك جدااااااااااااااااااااااا لما يكبرو عشان لما تبقى قدام حد
مش كل شويه تقولى بس وبطل ومش عارف ايه ونزعج الناس بصوتنا العالى لاء هى يا دوب نظره وطفلك هايفهم منها كل شيئ والاسلوب ده تستمرى عليه لحد ما الطفل يتم السنه
لما يبتدى يحبى ما تجريش بقى تلمى كل الفاظات والمفارش وتقولى أصله ما بيسيبش حاجه لاء انتى اللى مش بتابعيه ومش بتفهميه ان ده غلط وممنوع وبعدين ما انتى لما تشيلى كل حاجه من قدامه
لما تروحى عند حد هايشوف اللى مش شايفه فى بيته ويبتدى يلعب بقى ويكسر ما هى مغارة على بابا واتفتحت قدامه وتبقى يا حرام فى نص هدومك لاء طبعا انتى فى بيتك خلى كل شيئ ممكانه
وعوديه وعلميه ان ده ممنوع وما نلعبش هنا وما نمدش ايدينا بالتالى لما يروح عند حد هايبقى فاهم ان ده غلط وممنوع برضه لكن خلى بالك الكلام ده عن الحاجات اللى مش خطر يعنى ما تسيبيش
سكينه قدامه مثلا وتقولى افهمه لاء طبعا احنا بنتكلم عن الحاجات اللى ما تضروش ونقدر نعمله بيها ببساطه
********************************************
وصل الطفل لسن سنه وابتدا يياكل كويس من هنا نبتدى نعلمه اداب االطعام واحده واحده نعلمه فى الاول حاجه واحده ولما يتعلمها كويس ندخل على اللى بعدها نبتدى وهو بياكل نسمعه ونوضح
كلمة بسم الله ونبتدى نأكله واول حاجه نعلمهاله انه يقفل بقه وهو بياكل وياكل بيمينه والله يا بنات انا باشوف اطفال كتير جدا وكبار فى السن مش صغيرين وبنبقى فى مكان عام الاقى الطفل بياكل
وهو فاتح بقه على مصراعيه بجد منظر مقزز بمعنى الكلمه لما المنظر ده يلفت نظر جوزى ويقولى بصى الطفل ده بياكل ازاى أقول العيب على امه هو مجرد طفل امه هى اللى خلته فى موقف انتقاد
من الناس تخيلى الطفل ده لما يكبر هايبقى ازاى وأقرب الناس ليه هاتقرف من الاكل معاه
حاجه تانيه مهمه جدا كتير امهات وانا شوفت ده بنفسى لما تيجى تأكل ولادها ما تهتمش انها تسخن الاكل والله شفت ناس بيطلعو لولادهم الخضار من التلاجه ويأكلوهم وتقولك عشان يطلع نفسه حلوه
لاء يا ستى هو كده مش هايطلع نفسه حلوه هايطلع رمرام ومقزز تخيلى لما تشوفى حد بياكل الخضار مباشرة من التلاجه من غير تسخين هاتبصيله ازاى طب ليه توصلى بنتك او ابنك انه الناس تتقزز منه
مكسله تسخنى وبتتحججى بنفسه الحلوه لاء يا قمر النفس الحلوه دى انه ياكل كل نعمة ربنا وما يتبطرش على شيء
المهم كبر الطفل وأبتتدا يتامر على الاكل هنا بقى هانفهمه معنى النعمه وليه ربنا بيبعتلنا النعمه دى ونوريه بعينه ازاى فى ناس محرومه منها واننا أذا قولنا بنحب ده وبنكره ده ربنا ممكن يعاقبنا ويمنع عننا
الخير ده يعنى مثلا كانت بنتى وهى صغيره تيجى على اكله معينه مش حباها اول ما أشوف الرفض فى عينيها أقول بأستنكار شديد أستغفر الله يا رب سامحها هى ما كانتش تعرف ان ما ينفعش نقول
على النعمه مش بنحبها بأستنكار وخوف من ان ربنا يمنع النعمه دى فبالتالى البنت فهمت ان ده خط احمر ممنووووووووووع الكلام فيه
واحنا بناكل مش كل واحد ينقى احسن حاجه موجوده ويسيب الباقى من غير ما ييعمل حساب الناس اللى بتشاركه الطعام لاء طبعا ودى بتنمى مبدء المشاركه والعطاء
اقولها مثلا نقى حتة لحمه ششكلها حلو واديها لأخوكى او اقول لأخووها وهو بياكل حط بطاطسايه فى بق أختك ويشوفونا وانا وباباهم بنأكل بعض أما بقى فى حالة لو فى ضيوف
فأفضل شيئ هو اللى بيتحط امام الضيف واوريهم ازاى احنا بنهتم بالضيف ده ونرحب بيه دلوقتى لما يجيلنا حد بنتى هى اللى بتقولى يا مامى قدمى كذا وكذا وتاخد فناجين الشاى تقدمها بنفسها للناس
وبعد ما يخلصو تشيل الصينيه وتاخد الفناجين من اللى بيشرب
وهما بياكلو ممنوع اللعب على الاكل وممنوع الكلام والفم فيه اكل وطبعا دى كانت بتحصل فى الاول ولما كانت بتعمل كده ولا بازعق ولا اتعصب باخدها من أيدها ببساطه قدام المرايه واخليها تتكلم وبقها
فيه أكل وأقولها أيه رأيك شايفه المنظر فتتكسف من نفسها جدااااااا ولو كررتها بمنتهى الادب وأقولها أحنا مضطرين مناكلش معاكى عشان انتى مثلا بتاكلى وبقك مفتوح او بتتكلمى والاكل فى بقك
عشان كده هتاكلى لوحدك فى مكان واحنا فى مكان تانى لو ما جابتش نتيجه استنى لما نكون خارجين نتغدى بره مثلا وأقولها بنتهى الادب سورى يا جوجو مش هايينفع تيجى معانا اكيد هاتسألنى عن السبب
أقولها لنك بتاكلى بطريقه مش كويسه فطبعا هتوعدنى انها مش هاتعمل كده بديها فرصه واقولها خلاص انا موافقه لكن لو عملتى كده مش هاخدك غير لما تتبطلى كده وفعلا الطريقه دى مفعولها سحرى
ولو ما بطلتش بأمسك على قلبىى واخرج من غيرها ولما نرجع أقولها قد ايه كنا مبسوطين جدا بس كان ناقصنا أنها تبقى معانا وانى متاكده انها هاتبطل السلوك اللى بيضايقنى او السلوك الغلط
وبيجيب نتيجه مبهره
طبعا بيتعودو على غسل الايدين قبل الاكل وبعده لدرجة انها لو نسيت أقولها خلى بالك الحنفيه والصابونه زعلانين وفاكرينك مخاصماهم تقولى ليه اقولها عشان نسيتيهم وما غسلتيش أيدك
نيجى بقى للحلويات وما ادراكم ما الحلويات بالنسبه للاطفال دى بالنسبه لولادى بقى شيئ غير ذات اهمييه بالمره لأنى لما بامنع حاجه لازم أفهمهم أيه السبب منعتها ليه وعشان ايه مش أقول لاء وخلاص
او ممنوع وخلاص لاء ممنوع عشان ده بيعمل كذا وكذا وبأستغرب قوى من الام اللى بتعمل جوايز لولادها باالحلويات وتبقى مستغربه وتقولك ده الواد بيموت فى الشيكولاته ومش عارفه امنعه منها طب ما هو انتى
اللى عملتى فيه كده بدل ما تفهميه مخاطر الاكثار منها لاء ده انتى بتعمليهاله جايزه انا محدده ايام محدده فى الاسبوع ليهم كل واحد نوع واحد فقط من الحللويات ببعد الغدا وحاجات ما تكونش مضره
واوقات عشان اعودهم يشاركو بعض فى كل شيئ يبقى عندى حلويات كتير أقولهم مثلا ما فيش غير شيكولاتايه واحده وانتو الاتنين عاوزين يا ترى اعمل ايه ومش هاينفع أشترى تانى دلوقتى
يقومو يقولولى نقسمها سوا وفعلا اقسمها بينهم
وانتى بتاكليهم ما تسيبيش وقت الاكل مفتوح عشان هاينسو نفسهم ويفضلو ياكلو بالعشر ساعات ويبقى عذاب وأبلع يا ابنى امضغ يا أبنى لاء طبعا انتى هاتحطى قدر مناسب من الاكل مش تملى الطبق
على عينه وتجبريه يخلصه لاء انتى عارفه طاقة طفلك وتحدديله وقت محدد ونقعد ناكل ما خلصش هاتقومى بمنتهى البساطه شايله الاكل حتى لو ما اكلش منه غير معلقه واحده ومش هاتححطيله تانى بعد
شويه او وقت ما يقولك انا جعان لاء هاتحطى فى ميعاد الوجبه اللى بعديها والفاكهه اللى بين الوجبتين هو ممنوع منها لأنه مخلصش اكله فى ميعاده ومهما قال جعان ومهما عمل ما تضعفيش هاييجى فى
ميعاد الوجبه التانيه هايخلص الاكل قبل ما يتحط اساسا خلصنا خلاص اكل كل واحد يشيل طبقه ما فيش حاجه أسمها ماما تلم السفره كلها واللى ما يشلش طبقه سيبيه على السفره زى ما هو وعليه
ورقه صغنونه وعليها أسم صاحب الطبق
بعد الاكل بتقولى وهما وراكى (اللهم بارك لنا فيما رزقتنا وأرزقنا خيرا منه وقنا عذاب النار ) كل وجبه لحد ما يحفظوه هما الاتنين وبعد كده يبقى بالتناوب بينهم كل واحد مره والكل يردد وراه مره الدعاء ده
ومره (الحمد لله الذى رزقنى هذا من غير حول منى ولا قوة ) وعلى الحمام ونغسل أيدنا وأسنانا
مع الأرشادات البسيطه دى هتلاقى ولادك راقيين جدا فى طريقة اكلهم ومش بييملو بقهم اكل ويوقعو ويبهدلو الدنيا وتعلميهم طريقة المضغ الصحيحه وازاى ناكل بالراحه مش بنهم او لهفه وازاى سمينا الله قبل
الأكل وحمدناه بعده ولما تلاقيهم مثلا فيهم حاجه مميزه بنتك مثلا شعرها طويل او ناعم او اى حد فييهم فيه ميزه انتى وريه مميزاته وقوليله شوفت يا حبيبى عشان بنسمى ربنا ونحمده ونحافظ على النعمه
بتبان علينا ازاى وفهميه كل نوع من الاكل مغذى ازاى وانتو بتاكلو اتكلمى دايما عن فوايد الاكل والخضروات بس بطريق غير مباشر وجهى الكلام مثلا للبنت وخلى اخوها يسمع قولليلها عارفه يا فلانه
انا النهارده كنت تعبانه شويه بس لما اكلت كذا بقيت كويسه قوى الحمد لله ده الحاجه دى مفيده قوى او ووجهى الكلام لزوجك مثلا
ما تخليش ولادك يتعاملو مع الاكل براحتهم يعنى يوقعو ويبهدلو فى شكل الاكل وتقولى ممش مهم المهم انهم ياكلو كويس عللميهم احترام السفره والطعام وتقدير النعمه وافتكرى دايما ان من شب على شيئ شاب عليه
********************************************

من طرف **Admin** الأربعاء سبتمبر 30, 2015 3:16 pm

اداب الحديث
ولله الحمد والفضل والمنه ربنا كرمنى فى الاولاد واتعلمو اداب الحديث بسهوله جدا لأنى زى ما قولتلكم ابتديت معاهم من بدرى قوى وانا كمان قومت نفسى معاهم انا وباباهم
وفى مفردات كتير جدااااااا اتلغت من قاموس حياتنا كلنا انا وزوجى والاولاد ونفس طريقة الكلام اللى باطلبها من ولادى انا وزوجى بنستخدمها معاهم وبستخدمها انا وزوجى
مع بعض وعاوزه يا بنات انبه على حاجه صغيره أن زوجى ولله الحمد كان متعاون جدااااااا جدااااااااا معايا هو تعبنى شويه بس اصرارى جاب نتيجه لدرجة انى كنت باقوله
انا بربى تلاته مش اتنين ههههههههههههههههههههههههههههه والله لأنى كنت بتابعه هو شخصيا فى اى كلمه تطلع منه لن الاطفال فى سن معين بيبقو بغبغان بيقلد كل كلمه
وكل حركه فى ناس كتير والله العظيم شوفتهم بعينى بيعلم ابنه الشتيمه وبيبقى فرحان قوى لما الطفل يرددها وييجى قدام قرايبه ويتباهى بأن أبنه بيشتم وقول كذا لعمو يا حبيبى
وعمو يضحك وبابا يضحك والكلمه تلزق فى بق الطفل وهاييجى اليوم اللى يقول فيه نفس الكلمه لبابا وماما وليا صدديقه مقربه بتعانى من أسلوب ولادها معاها وتطاولهم عليها
وحاولت انصحها كتير بس للأسف هى مش متعاونه مع انها بتعانى أشد المعاناه وبتبكى من كلام ولادها
المهم نرجع لموضوعنا طبعا كلنا نتمنى ان ولادنا يتكلمو بأسلوب راقى ومهذب وأستخدام مفردات معينه وألغاء مفردات معينه نشوف بعض المفردات الملغيه من قاموس حياتى
وحياة ولادى وده شوية نماذج على سبيل المثال لا الحصر ( نعم . أييه . انت . لاء . ماليش دعوه . مش هاعمل كذا . السب بجميع أشكاله أبتداء من كلمة غلس او غلسه
او وحشه أو بايخه أو اى لفظ ممكن تتخيلوه )
ودى بعض الامثله للمفردات اللى بنستخدمها دايما ( أفندم . حضرتك . حاضر . من فضل حضرتك للكبير . من فضلك للصغير . أسف . ممكن . بعد أذن حضرتك )
وده أبتديته من اول ما أبتدو يتكلمو مع اول نطق لما انده على حد ما فيش حاجه أسمها نعم لما الطفل يقول نعم انا اصححله لاء يا حبيبى نقول افندم ودى طبعا للكبار فقط
انما للأطفال ما فيش مانع نقول نعم وافضل مستمره فى الكلمه دى فتره لحد ما يتعلمها ولما يغلط ويقولى نعم مش بأرد عليه او اقول نقول نعم برضه يروح مصلحها فورا وقايل
افندم ونفس الكلام فى حالة انه ما سمعنيش كويس مش يقولى أيه لاء برضه افندم وما تنسيش وما تتهاونيش ولما يكلمك الطفل وينسى المفردات دى ما ترديش عليه
ولما يقول يا ماما ليه مش بتردى تقولى عشان انت ما قولتش كذا فانا ما ينفعش أرد عليك وزى ما قولتلكم من اول ما يبتدى يتكلم يعنى يا دوب بيتهته بابا ينده نقول افندم يا بابا
جوجو كانت بتقول ادندن ههههههههههههههههههههههههههههههههه وبالمثل حضرتك وباقى المفردات يعنى مثلا الطفل قال انت او انتى نبصله بأستنكار ونقول عيب احنا
مؤدبين ما بنقولش انت بنقول كذا مش تقوليله لاء ما تقولش بأمر لاء فهميه انه مؤدب ومش بيقول كذا واديله البديل وقوليله قول كذا ولما نشوف حد بيققول انت والكلام ده
نلفت نظر الطفل قوليله شوف الطفل ده بيقول ايه تفتكر ينفع يقول كذا ولا يبقى عيب هايقولك لاء عيب تقوليله لكن احنا شاطرين وبنقول كذا كذا
كذلك لو حب يطلب حاجه من غير ما يقول من فضلك تقولى أسفه مش هاقدر اعملها هأيقولك ليه قوليله عشان انت ما قولتش من فضلك وهكذا وده تعاملى انا وزوجى
لما ينده عليا باقوله افندم او لو ماسمعتش بس هو مش بيقولى كده وده انا فهمته للولاد ان بابا ليه وضع خاص عشان ده بابانا كلنا وهما فااهمين ده كويس وفاهمين كويس
ان مش كلام الكبار احنا ينفع نردده لما يصادف وحد يقول كلمه والطفل يرددها ألفت نظره واقول عيب الاطفال المؤدبين مش يقولو كذا
وطبعا فهمتهم ان كل أب وام ليهم أسلوب فى تربية ولادهم يعنى مش عشان فلان بيقول نعم يبقى قليل الادب لاء هو باباه ومامته شايفين كدا وانت باباك ومامتك شايفين كده
عشان يفهم طبيعة الاختلاف بين البشر ألا لو حاجه صارخه زى مثلا يكون طفل بيشتم ده بمنعهم من الاختلاط بيه الا فى أضيق الحدود ولو اضطرتنى الظروف

يبقى نتعامل معاه لكن ما نتعلمش منه ومش بسيب موقف يعدى مهما كان تافه من غير ما ألفت نظرهم واخليهم بنفسهم يقولو أيه التصرف اللى لاحظو انه غلط وده بيفدنى
جدا انه تبقى تربيه عملى بيشوف بعينه الغلط ويشاور عليه ويرفضه بالتالى بيلزق فى دماغه
لما بقى يصادف ويسمع كلمة غلسه مثلا او غلس ويكررها بأسكت خالص وما ازعقش واستنى بعدها بشويه وأقولهاله فيزعل أقوله أيه رأيك شوفت انت لما قولتها زعلت
فلان ازاى طاالما مش بتحب حد يغلط فيك يبقى ما تغلطش فى حد وعيب وما يصحش عشان انت لسانك حلو وبيقول قرأن والرسول عمره ما كان بيشتم والمسلم الصح
مش بيشتم وهكذا وزى ما قولت باقول واكرر الموضوع مش سهل ومحتاج صبر وطول بال ومتابعه وتكرار وتغيير من نفسك لو عندك مفردات غلط لازم تقوميها
وما تجيش فى يومين تلاته وتزهقى وتقولى مش شايفه نتيجه لاء والله النتيجه هاتظهر وتفرح قلبك لو صبرتى والطفل بطبعه ما بيحبش القيود والاوامر هاينفذ مره
ويبطل عشره ويكسل عشرين خليكى وراه ما تياسيش وامدحيه قدام الناس وقولى للناس قدامه شوفتو فلان ماشاء الله مؤدب ازاى ده مش بيقول غير كذا وكذا وعمره ما قال
كذا وكذا هايحب قوى الصوره اللى رسمهاله لنك حسستيه انها مميزه وهايحب يثبت انه كده فعلا ولما يغلط ما تزعليش وتقولى تعبى راح لاء طبعا ان الله لا يضيع أجر
من احسن عملا عمر تعبك ما يروح وهاتنبهرى بالنتيجه ويطلع أبنك ولا بنتك لسانه حلو وعفيف اللسان وخلى دايما كلامك معاهم بحب
يعنى مش روح يا زفت وتعالى يا نيله ولا الله يخربييتك ولا ولا ولا لاء طبعا عاوزه منه حاجه تقولى حبيب ماما ممكن تعمل كذا او مين حبيب ماما اللى هايجيب لماما كذا
لما يجيبلك طلب تقولى تسلمى يا قلب ماما او يا عيونى ولما يغلط كده برضه تزعل ماما حبيبتك منك ولما ولادى بيغلطو قووووووووووى وببقى متنرفزه جدا وبزعق
بافضل اقول ليه كده ليه عملتو كده الله يهديكم يا ولادى الله يهديكم بدل ما أفضل ازعق او اشتم وعلى طول برضه لما اجى اطلب حاجه من جنى او زين أقولها جنى ممكن
تجيبيلى كذا الله يرضى عليكى يا حبيبة امك
ودايما اهتم ان الصوت يبقى واطى والكلام بالراحه لما بيتكلمو بصوت عالى باحط ايدى على ودانى وانا متضرره جدا واقول مش هاسمع غير لما توطى صوتك
وطبعا ممنوع مقاطعة الحديث لأى سبب وكتير جدا بينسو ويقاطعونى ببص بحززم وأقول خليك واخد بالك انى بتكلم اوقات زين يصر ويلح أنه يقول اللى عاوزه
اقولك انا قولت انى باتكلم واكون ببرق شويه بيروح ساكت ومستنى لما اخلص كلام
حاجه تانيه بتلفت نظرى ان بعض الامهات بتبقى بتتكلم مع حد صديقه مثلا او قريبه فى كلام كبار والبنت قاعده فى وسطيهم او بتتكلم مع حد وبنتها بتلاحقها فى الكلام
وتصلحلها كمان وتفكرها بالمعلومه أيه المهذله دى لاء وتيجى فى الاخر تقولك البنت سورى فى اللفظ بقت منسونه مش عارفه ليه طب ما انتى اللى خليتيها كده ايه يقعد
طفله فى وسط الكبار لو جاتلى صديقه او قريبه لوحدها يبقى يا دوب بنتك تطلع تسلم وتقعد مع الضيفه شويه صغيرين ولما نبتدى نتكلم توشوشيها انها تدخل جوه عشان
هاتتكلمو مع بعض واحده واحده تعلميها انها تدخل جوه بالنظره لو قريبتك معاها اطفال يبقى تاخد الاطفال ويدخلو اوضتهم يلعبو وممنووووووووووع تماما يتقفل عليهم باب
الاوضه وما تقوليش دول عيال وعادى لاء يا ستى مش عادى باب الاوضه ما يتقفلش لأى سبب وتفضلى كل شويه تستاذنى وتبصى عليهم وتطمئنى ولو غلطت
او اتدخلت فى الكلام لو انتو فى بيتكم تاخديها بالراحه وتدخلى جوه تفهميها بمنتهى الحزم انها هاتتعاقب لما الناس تمشى وفعلا تعاقبيها ولو عند الناس تفهميها بينك
وبينها ان لما تروحو هايبقى فى عقاب عسير بس من غير ما تلفتى نظر حد سواء عندك او انتى اللى عند الناس واول ما تنزلى من عند الناس تبتدى عقابك بانك
ما تكلميهاش خالص وتقوليلها انا مش هاتكلم معاكى عشان علمتى كذاا وحسابنا لما نروح واياكى ثم اياكى تتهاونى فى حاجه زى دى او تعديها ومهما اعتذرت وبررت
ارفضى والمره اللى بعديها يا ريت يا ريت تخرجى من غيرها وفهميها انها مش هاتروح معاكى عشان عملت كذا المره اللى فاتت حتى لو مش هاتروحى زياره اخرجى لوحدك
لفى حوالين البيت ييجى نص ساعه وسيبيها مع باباها وفهميها انك رايحه زياره وهكذا بالصبر والاستمرار كل شيئ بيتصلح لن صدقينى البنت اللى بتتكلم اكبر من سنها
وفى مواضيع ما تخصهاش والله بتبقى منتقده جدا وشكلها وحش ومثار سخريه وماده خصبه لجلسات النميمه ليه تعملى فى بنتك كده خليها ملكه متوجه باخلاقها وادبها
ورقى كلامها هى والولد ما هو مش عشان ولد يبقى بلطجى وطريقة كلامه زى ولاد الشوارع ويطجن فى الكلام ما هو راجل بقى لاء يا حبيبتى الرجوله عمرها ما كانت
زور واسع وخلاص لاء الرجوله اخلاق وتصرفات وادب بتزرعيه فى أبنك من طفولته
طولت عليكم بس الموضوع يستاهل ويا رب اكون ما نسيتش حاجاه فى الجزئيه دى
*************************************************
السلام عليكم ورحمة الله وبركاته
حياكم الله وبياكم وجعل الجنة مثواناا ومثواكم
معلش يا بنات سامحونى انا عارفه انى اتاخرت عليكم بس والله كنت مشغوله خالص اليومين اللى فاتو
يلا نكمل بعون الله النهارده هانتكلم عن اداب قضاء الحاجه وهانفهم ازاى وامتى نعود ولادنا الاعتماد على نفسهم
شوفو يا بنات من اول ما البيبى يبتدى يمشى نعوده ونعمله ان المنطقه دى ممنوع تماما اى حد يتعامل معاها غير ماما وبابا ونانا فقط لا غير لأن أبنك او بنتك لسه بيلبس بامبرز ووارد جدا انك تسيبيه عند
ماما لأى ظرف وماما طبعا هاتغيرله فنفهمه ان نانا كمان ممكن تتعامل لكن اى حد تانى ممنووووووووووووووووووووووووووووووع ولو حتى انه يهزر مع البيبى ويضربه على بوبته ( مؤخرته ) وانا عامله
أسم للمؤخره أسمه ( بوبو ) وكل أم بتسمى زى ما هى عاوزه وأسم تانى للمنطقه الحساسه بالنسبه للبنت أسمها ( علبة اللولى ) والبنت عارفه الاسم ده كويس وبالنسبه للولد المنطقتين اسمهم (بوبو)
لحد كده تمام نيجى مثلا لو حد وفى ناس كتير بتعملها بيضرب الطفل على مؤخرته على سبيل الهزار وانا بأكره الحركه دى جداااااااااااا لأنها بتعود الطفل ان الهزار مع المكان ده عادى وده هايجرنا لمشاكل
لا حصر ليها اعاذنا الله وأياكم كل الشرور فأبتدى ان مثلا تفتعلى انتى موقف يعنى تخلى باباه مثلا او اختك بالاتفاق معاهم طبعا انهم يعملو كده قدامك تروحى باصه للطفل وتقوليلو حرااااااااام المكان ده
حراااااااااااام قول لخالتو مثلا عيب يا خالتو وولادك هايتعودو مره على مره ان المكان ده محظوووووور ولما تيجى تغيرى للبيبى يا ريت يا ريت ما تغيريلوش قدام حد أبداااااااااااا خلى طفلك يتعود على الخصوصيه
وعلى احترام خصوصية جسمه من صغره ولا تطلبى من حد ابدااااااااااااااا انه يغيرلهم البامبرز ألا فى أشد الظروف انك تكونى عيانه مثلا ومامتك مش معاكى فبالتالى الطفل هايطلع وهو عارف ان ما فيش حد
شاف مكانه الحميم من جسمه ابدا ونمى جواهم الحياء فى النقطه دى هايريحم قوى لما يكبرو كبرو الاطفال شويه وعاوزه تعلميهم يستغنو عن البامبرز اول ما يتعلم الطفل يقعد علميه يقعد على البوتى مره فى اليوم
حتى لو ما عملش حاجه مش مهم بس ما تسيبيهوش عليها فتره طويله عشان ما يفتكرش انها مكان للعب او يزهق منها مره على مره هايعمل فيها واختارى الاوقات اللى انتى عارفه ان ده وقت قضاء الحاجه
بالنسبه لطفلك مثلا فى اطفال بتعمل بيبى اول ما تصحى من النوم وفى طفل بيعمل اول ما ياكل وفى طفل بيعمل بعد الاكل بفتره كل ام ادرى بطفلها واحده واحده هايتعود ولما يعمل تشجعيه وتبوسيه ووريه
قد أيه انتى اتبسطى وما تفكريش تقلعيه البامبرز ألا لما يتم سنتين لأن مهما عملتى مش هايقدر لأن المثانه والتحكم فى العمليه دى مش بيكمل ألا لما الطفل يتم سنتين فهاتتعبى نفسك على الفاضى خلى كل شيئ
ياخد وقته وييجى على مهله واول ما تلاقى من الطفل أشاره انه عاوز يستغنى عن البامبرز أستغليها فورا يعنى بنتى مثلا اول ما تمت سنتين لاحظت انها لما باجى البسها البامبرز بترفع جسمها واوقات بتجرى
منى فعرفت انها خلاص ده وقتها اتكلمت معاها وسالتها عاوزه تقلعيه قالتلى اه قولتلها خلاص هانقلعه بس على شرط ما تعمليش على نفسك ابدااااااااااااا وافقت وابتدينا على بركة الله واطلبى من ربنا انه يعينك
وصدقينى والله كان من أسهل ما يكون وبفضل الله ما عملتش على نفسها مرتين تلاته بالكتير قوى ووطبعا ميه انما التانى ولا مره ولله الحمد وما حدش يقولى انها فى السن ده ممش بتفهم كلامى لاء طبعا بتفهم
كويس قووووووووووى بس مش بتعرف تتجاوب لكن هى فاهمه اللى بتقوليهولها وقلعتهولها بفضل الله وخلى بالك من نقطه مهمه جداااااااااااااا فى ام تبتدى بعد ما الطفل يتك سنتين تجرب وشويه تروح ملبساهوله
تانى الطفل كده هايتذبذب ومش عارف هو قلعه ولا لاء وممكن مما ياخدش باله هو لابسه ولا لاء فمن فضلك ما تلغبطيهوش قلعه يبقى خلاص بيقلعو طووووووووول النهار وانتى كل فتره تاخديه على البوتى
وكا يوم تطولى الفتره بين المره والتانيه لحد ما يتعود يمسك نفسه ومن فضلك البوتى تفضل فى مكان محدد وييكون الطفل عارفه كويس وقوليله لما تعوز تعمل بيبى روح أقعد على البوتى
خلاص قلعناه بالنهار وكله تمام ممنوع الخروج نهائى فى الفتره دى لمدة مثلا عشر ايام او أسبوعين عشان ما تضطريش تلبسيهوله وأنتى خارجه لاء نمنع خروج لحد ما يتعود واول ما تبتدى تنزلى من غيره
بلاش مشاوير بعيده عشان ممكن ما يقدرش يمسك نفسه وبعد ما قلعنا بالنهار حاولى تنيميه بالنهار لمادة ساعه من غيره وهكذا لحد ما ييجى وقت نقلعه بالليل لو نام بالنهار ولاقيتيه صحى مبلول يبقى لسه
وقت الليل ما جاش انما لو صحى ناشف يبقى تمام قوى نقلعه بالليل ونمنع بقى قبل النوم بساعتين اى سوائل او اى اكلات بتعمل سوائل ونفرش مشمع تحت الملايه ويدخلل الحمام قبل النوم مباشرة
ولما ينام نصحى بالليل مرتين مش كل شويه تجرى تصحيه عشان يعمل لاء اوعى لأن لو صحيتيه كل شويه هاتخليه يتعود ان ماما بتصحينى وهايعتمد ان فى منبه خارجى لكن لما تسيبيه هايتعود
يعتمد على نفسه وتنبهى قبل ما ينام انه شطور ومش بيعمل بيبى على نفسه ولو عمل هايلبس بامبرز تانى وما تزعليش لما يصحى من النوم مبلول ما هو طفل وما تقارنيش بينه وبين حد تانى لأن كل طفل
حاله لوحده حتى لو كانو اخوات انا أبنى قلعه وهو سنتين و3 شهور فى حين ان اخته قلعته على سنتين بالظبط فكل طفل حاله خاصه لوحده قلعه خلاص الحمد لله ما تجريش بقى تحكى للقريب والغريب
انه ما تعبكيش لأن صدقينى والله عن تجربه الطفل بيتنظر بسهوله جدا
المهم الطفل خلاص بقى بيعمل بيبى من غير بامبرز هنا بقى ينتهى دور البوتى مش هايفضل بقى عليها عمره كله لاء دى حاجه مساعده عشان يبطل بامبرز لكن مش اساسيه فى حياته يتعود بقى يقعد
على التواليت ومره على مره هايتعود لو لقيتيه رافض وخايف وريه نفسك وانتى قاعده وشوف مامى بتعمل أيه ومامى شطوره ازاى ولما يبتدى يقعد على التواليت أديله مكافأه وشجعيه ووواحده واحده تبتدى
تعوديه بعد بيبى الميه يتشطف لوحده خليه يتحرك على التواليت لحد ما يوصل للشطاف ويفتحه لكن البيبى التانى لازم تشطفيه بنفسك وبعد ما يتشطف سواء لوحده او بمساعدتك عوديه يتنشف
لااااااااازم يتعود على التنشيف بدرى خلى دايما فى التواليت بكرة مناديل ويتعود يتنشف من صغره ما تستنيش انه يكبر وتقولى لما يكبر هاعوده ولو بنت عوديها انها 3 مرات فى اليوم الاندر يتغير
ولو ولد مره واحده وان السيفوون يتشد بعد كل مره ولو ابنك ولد وابتدى يعمل ميه وهو واقف عوديه انه يقف ثابت وفى مكان محدد منعا للطرطشه وانه يرفع القاعده بتاعة التواليت القاعده البلاستيك مش الغطاء
وبعد ما يخلصو ويشدو السيفون الغطاء يتقفل
وببعد كده بقى لما يكبر شويه تعوديه اانه زى ما دخل لقى الحمام جاف ونظيف يخرج منه وهو بنفس الصوره خلى دايما فى الارض فوطه صغيره شويه وفهميه لو فيه مايه جت فى الارض الشطاف طرطش مثلا
او اى سبب ينشفها برجله بالفوطه دى وبعد ما يخلص بيبى ويشد السيفون لازم يتعود انه يعمل التواليت بالفرشاه ويشد السيفون تانى ويقفل الغطاء ويغسل أيده لاااااااااااااااازم بعد كل حمام ويطلع ويقفل الباب وراه
وممنوع تماااما ان حد من الاطفال يدخل والتانى جوه لأى سبب وخلى فى أسم للبيبى يعنى مثلا عندى الميه أسمها بيبى والتانى أسمه بيشو ولما الطفل يطلع غازات وانتو قاعدين ومش فى المكان المخصص
لازم تفهميه ان ده عيب وانه انسان ولازم يعمل كده لكن برضه فى التواليت وتفهميه ان ده شيئ مقزز والناس ممكن تقرف منه ولو مثلا ما غسلش أيده بعد ما يعمل تواليت ما تغصبيش عليه انه يغسلها
لكن ما تخليهوش يلمس حاجه ولا يلعب مع اخواته وتفهميه بينك وبينه ان ده عشان ما غسلش أيده ولما بابا يجى من الشغل قولى لبابا ما تسلمشش على فلان عشان ايده مش نظيفه عشان ما غسلهاش
بعد البيبى ده فى حالة انه لسه ما غسلهاش
نيجى للأماكن العامه يتعود الطفل انه لما يدخل التواليت فى مكان عام يشوف التواليت لو نظيف يستعمله انما لو لا قدر الله قذر يبقى لايستعمل وندور على مكان تانى والتعامل فى تواليتات الاماكن العامه
يبقى بالمناديل يعنى ما يلمسش شيئ يأيده نهااااااااااااااائى وهو داخل التاوليت ياخد معاه وايبس عشان لما يخلص ينظف نفسه بيها عشان ممنوع أستخدام شطافات الأماكن العامه نهااااااااااااائى منها
للأصابه باى عدوى لا قدر الله ودايما يبقى فى شنطتك البلاستيك اللى بيتحط على التواليت أنما لو مش معاكى يبقى يتحك على التواليت منادييل عشان الطفل يقعد عليها وبعد ما يخلص يمسك منديل نضيف
ويشيلها يحطها فى الباسكت والكلام ده طبعا للأطفال الكبار نوعا ما اللى بيدخلو بره الحمام لوحدهم انما لحد خمس سنوات بيدخل بره بمساعدتك وبالنسبه للكبار نوعا زى سن جنى بنتى كده من وهى عندها
6سنين ممنوووووووع نهاااااااااااائى نعمل بيشو فى مكان عام لأننا مش بنستعمل الشطاف وزى ما قولت وبشدد نهتم بنضافة المكان حتى لو عام لأن فى ناس غيرنا هايستعملوه
اتمنى اكون أفادتكم وانتظرونى فى مشاركه جديده

منقول

تجربه ام فى تربيه ابنائها ما شاء الله عليهم

تجربه ام فى تربيه ابنائها ما شاء الله عليهم

رد: تجربه ام فى تربيه ابنائها ما شاء الله عليهم